-- مصطفى: أتكلموا ساكتين ليه؟!!
- مها: اتكلم عشان اتضرب تاني؟ دي أول مرة في حياتي ماما تضربني! أول مره حد في الدنيا يضربني!
- محمود: وأنا هاقول ايه بعد ما كسرتلي الجيتار؟
منى: انتوا اللي اضطريتوني اعمل كده.
-- مصطفى: مفيش حد مضطر يعمل حاجه مش من حقه
منى: يعني مش من حقي لو حد غلط اضربه؟
-- مصطفى: لأ مش من حقك
منى: أنا أمكم!
-- مصطفى: مالكيش فضل في كده. كل واحده ممكن تبقى أم.
- مديحة: هذا جناه أبي عليّ وما جنيت على أحد.
-- مصطفى: احنا مابنتناقش اذا كنتي ام ولا لأ. أحنا دلوقتي بنتناقش في سلطة الادارة في البيت ده. سلطة إعطاء الأوامر.
- محمود: بأي حق تكسريلي الجيتار؟
منى: أنا اللي اشتريته ومن حقي أكسره على دماغك لو ماعجبنيش الحال. أنا هنا رب البيت ده. أنا اللي بشقى وبتعب وبشتغل عشان اجيبلكوا الفلوس اللي باعيشكوا بيها.
-- مصطفى: ده مش سبب كافي عشان تتحكمي فينا. لو أتبعنا منطق كل من يصرف يتولي هو الإداره، معنى كده اني ادور على أم تانية أغنى منك تصرف عليا وتتولى ادارة حياتي.
منى: اااه يبقى من حقي أنا كمان اذا ماكنتش اتولى ادارة حياتكوا اني مصرفش عليكوا.
- مديحة: لا مش من حقك. انتي مابتصرفيش علينا ياماما بإدارتك، لكن المجتمع والقانون بيفرض عليكي انك تصرفي علينا.
منى: والحب يا مصطفى؟ أنا محستش لا بالمجتمع ولا بالقانون وأنا باشتريلك اللبس ده.. اشتريته لأني بحبك!
-- مصطفى: الحب عاطفة رأسمالية.. الحب حجـة الديكتاتورية! كل ديكتاتور ممكن يعمل اللي هو عايزه ويقول للناس إنه بيحبهـم.. وهو مابيحبش إلا نفسه..
- ممدوح: يعني يا ماما علشان ما بشتريش ليكي حاجة، أبقى مابحبكيش؟!
منى: ..............
- مهـا: كلهم مش فاهمين إيه هو الحب..
-- مصطفى: كلنا بنحبك.. لكن مابنطلبش نتحكـم ف حياتك.
جزء من فيلم #إمبراطورية_ميم | 1972، إخراج "حسين كمال"، قصة وحوار "إحسان عبدالقدوس"، إعداد سينمائي "نجيب محفوظ"، مدير التصوير "وحيد فريد"
ليست هناك تعليقات:
إرسال تعليق